ہو چلے جسم نما چار پہر جانا ہے

ہو چلے جسم نما چار پہر جانا ہے

سڑکیں سنسان ہوں تاریک ہوں گھر جانا ہے

پہلے بینائی گئی پھر گئی سانسوں کی دھمک

زندگی باندھ لے سامان سفر جانا ہے

اپنی بے لوث محبت کا بھرم ہے مجھ کو

کوئی امید نہیں ان سے مگر جانا ہے

کچھ نہ باقی رہے رشتہ میں توقع تو رہے

مسکرا کر تو نہ جا دل سے اتر جانا ہے

ایک دن عشق میں جسموں کی حکومت ہوگی

ایک دن تاش کے محلوں کو بکھر جانا ہے

دربدر ہو کے بھی ہجرت تو نہ آسان ہوئی

پاؤں پتھر ہوئے جاتے ہیں کدھر جانا ہے

مشکلیں اس کے سوالوں میں بنائے رکھنا

آتے ہوں تو بھی جوابوں سے مکر جانا ہے