ho chuki bagh mein bahaar afsos

ho chukī baaġh meñ bahār afsos

aah ai bulbulo hazār afsos

qāfila umr kā hai pā-ba-rikāb

ziist kā kyā hai e'tibār afsos

mirī rātoñ ko dekh soḳhtagī

na kiyā ek din bhī yaar afsos

shab se parvāne kī lagan meñ sham.a

sub.h tak roī zaar zaar afsos

saḳht be-tābī se kaTī kal raat

aaj bhī dil hai be-qarār afsos

ḳhāl-o-ḳhat ko samajh ke dāna-o-dām

murġh-e-dil ho gayā shikār afsos

aah dast-e-junūñ se ai nāseh

hai garebān taar taar afsos

jaan hoñToñ pe aa ga.ī hamdam

lekin ab tak phirā na yaar afsos

umr ġhaflat meñ kaT ga.ī hai 'nasīr'

aah afsos sad-hazār afsos

ho chuki bagh mein bahaar afsos

aah ai bulbulo hazar afsos

qafila umr ka hai pa-ba-rikab

zist ka kya hai e'tibar afsos

meri raaton ko dekh soKHtagi

na kiya ek din bhi yar afsos

shab se parwane ki lagan mein shama

subh tak roi zar zar afsos

saKHt be-tabi se kaTi kal raat

aaj bhi dil hai be-qarar afsos

KHal-o-KHat ko samajh ke dana-o-dam

murgh-e-dil ho gaya shikar afsos

aah dast-e-junun se ai naseh

hai gareban tar tar afsos

jaan honTon pe aa gai hamdam

lekin ab tak phira na yar afsos

umr ghaflat mein kaT gai hai 'nasir'

aah afsos sad-hazar afsos