ہو گئے بچھڑے ہوئے ان کو زمانے کتنے

ہو گئے بچھڑے ہوئے ان کو زمانے کتنے

دل میں محفوظ ابھی تک ہیں فسانے کتنے

ایک معمولی سی تکلیف پہ کیوں چیخ اٹھے

زندگی ہے تو ابھی دکھ ہیں اٹھانے کتنے

کر لیا عہد تو پھر اس کو نبھانا سیکھو

تم بناتے ہو ہر اک روز بہانے کتنے

اور ہوتے ہیں جنہیں ہوتی ہے دولت کی طلب

ہم نے ٹھکرا دئے دنیا کے خزانے کتنے

یوںہی آ جانے سے دیدار نہیں ہو سکتا

اک جھلک پانے میں لگتے ہیں زمانے کتنے

اس کے لہجے میں تکبر کی رمق ہے اب بھی

روز گنتا ہے وہ تسبیح کے دانے کتنے

شاعری ہم کو وراثت میں ملی ہے ناظرؔ

کہہ گئے گیت غزل اور ترانے کتنے