ہو گئے ہاتھ قلم یہ تو خبر ہونی تھی

ہو گئے ہاتھ قلم یہ تو خبر ہونی تھی

لیکن اس ظلم سے تائید ہنر ہونی تھی

حسن جلوہ ہے کہ پردہ ہے کہ محرومی ہے

ایسے اندیشوں میں بدنام نظر ہونی تھی

تم تو بس مشعلیں لے کر سوئے منزل نکلے

روشنی سینوں میں ہم راہ سفر ہونی تھی

فکر جذبے کی طہارت ہے گنہ گار نہ کر

جو غلط بات تھی محروم اثر ہونی تھی

معترض کوئی نہ تھا زر کی سخن گوئی پر

مفلسی مفت میں بدنام مگر ہونی تھی

اس کی مٹھی میں مرے اشک کی قیمت کو نہ پوچھ

سیپ میں آتے ہی یہ بوند گہر ہونی تھی

میں تو آواز تھا کیسے نظر آتا اے نورؔ

صرف رسوائیٔ ارباب نظر ہونی تھی