ho gae hain apne gird-o-pesh se begana hum

ho ga.e haiñ apne gird-o-pesh se begāna ham

sunte sunte so ga.e haiñ ziist kā afsāna ham

dil nazar ehsās sab kuchh un pe qurbāñ kar chuke

pesh karne ke liye ab laa.eñ kyā nazrāna ham

ik nazar meñ be-niyāz-e-jām-o-sahbā kar diyā

kyoñ na terā dam bhareñ ai nargis-e-mastāna ham

shauq se Dhaa.e sitam koī hamārī jaan par

haañ uThā.eñge kisī ke nāz-e-ma.ashūqāna ham

mujrim-e-ulfat haiñ apne jurm kā iqrār hai

jo bhī kahiyegā kareñge pesh vo jurmāna ham

ehtiyāj-e-sāqī-o-sahbā bhī ho kyoñ ham-nashīñ

ḳhud bhareñge aaj apnī umr kā paimāna ham

kyā ajab gabr-o-musalmāñ kā vatīra dekh kar

ho ga.e haiñ be-niyāz-e-ka.aba-o-but-ḳhāna ham

jis qadar armāñ the dil meñ dil se ruḳhsat ho ga.e

apne pahlū meñ liye phirte haiñ ab vīrāna ham

sar-ba-kaf ho kar kareñge har balā kā sāmnā

sharm rakkheñge tirī ai himmat-e-mardāna ham

sach batā be-uzr ham sā bhī kahīñ dekhā koī

jab kahā dīvāna tū ne ho ga.e dīvāna ham

sham-e-raushan meñ kashish apne liye 'tālib' kahāñ

sham-e-kushta ho to haiñ jī jaan se parvāna ham

ho gae hain apne gird-o-pesh se begana hum

sunte sunte so gae hain zist ka afsana hum

dil nazar ehsas sab kuchh un pe qurban kar chuke

pesh karne ke liye ab laen kya nazrana hum

ek nazar mein be-niyaz-e-jam-o-sahba kar diya

kyon na tera dam bharen ai nargis-e-mastana hum

shauq se Dhae sitam koi hamari jaan par

han uThaenge kisi ke naz-e-mashuqana hum

mujrim-e-ulfat hain apne jurm ka iqrar hai

jo bhi kahiyega karenge pesh wo jurmana hum

ehtiyaj-e-saqi-o-sahba bhi ho kyon ham-nashin

KHud bharenge aaj apni umr ka paimana hum

kya ajab gabr-o-musalman ka watira dekh kar

ho gae hain be-niyaz-e-kaba-o-but-KHana hum

jis qadar arman the dil mein dil se ruKHsat ho gae

apne pahlu mein liye phirte hain ab virana hum

sar-ba-kaf ho kar karenge har bala ka samna

sharm rakkhenge teri ai himmat-e-mardana hum

sach bata be-uzr hum sa bhi kahin dekha koi

jab kaha diwana tu ne ho gae diwana hum

sham-e-raushan mein kashish apne liye 'talib' kahan

sham-e-kushta ho to hain ji jaan se parwana hum