ho gae hain in dinon kuchh aql se mazur hum

ho ga.e haiñ in dinoñ kuchh aql se ma.azūr ham

hai jo nazdīk apne us ko jānte haiñ duur ham

jis ne ta.alīm-e-anal-haq dī tujhe roz-e-alast

haiñ usī ustād ke shāgird ai mansūr ham

abadiyat ke bhes meñ kuchh ham se ban saktī nahīñ

vo ga.e din jin dinoñ rakhte the kuchh maqdūr ham

vā.e-nādānī ki haiñ anjām se kyā be-ḳhabar

do hī din kī zindagī par ho ga.e maġhrūr ham

mas.ala kyā pūchhte ho 'faiz' jabr-o-qadr kā

muddatoñ muḳhtār the ab ho ga.e majbūr ham

ho gae hain in dinon kuchh aql se mazur hum

hai jo nazdik apne us ko jaante hain dur hum

jis ne talim-e-anal-haq di tujhe roz-e-alast

hain usi ustad ke shagird ai mansur hum

abadiyat ke bhes mein kuchh hum se ban sakti nahin

wo gae din jin dinon rakhte the kuchh maqdur hum

wae-nadani ki hain anjam se kya be-KHabar

do hi din ki zindagi par ho gae maghrur hum

masala kya puchhte ho 'faiz' jabr-o-qadr ka

muddaton muKHtar the ab ho gae majbur hum