ho gae jab ek ja kuchh tishnigan-e-sham-e-gham

ho ga.e jab ek jā kuchh tishnigān-e-shām-e-ġham

sū-e-mai-ḳhāna chalā ik kārvān-e-shām-e-ġham

hijr ke ġham se baḌā duniyā meñ koī ġham nahīñ

sāmne aa.eñ kahāñ haiñ qātilān-e-shām-e-ġham

jab jalā liiñ bastiyāñ gurgoñ ne jitnī ban paḌī

parda-e-bātil se nikle hākimān-e-shām-e-ġham

aaj to saaqī mujhe bas jām-e-ḳhālī chāhiye

āñsuoñ se bhar chukā hai martabān-e-shām-e-ġham

panchhiyoñ ne apne apne ghoñsloñ meñ lī panāh

sūnā-sūnā paḌ gayā hai āsmān-e-shām-e-ġham

tishnagī āvārgī ḳhāna-ḳharābī bekalī

hai bahut vus'at liye ye ḳhāndān-e-shām-e-ġham

der tak karte rahe bāteñ tirī tasvīr se

aur karte 'nazr' kis ko rāzdān-e-shām-e-ġham

ho gae jab ek ja kuchh tishnigan-e-sham-e-gham

su-e-mai-KHana chala ek karwan-e-sham-e-gham

hijr ke gham se baDa duniya mein koi gham nahin

samne aaen kahan hain qatilan-e-sham-e-gham

jab jala lin bastiyan gurgon ne jitni ban paDi

parda-e-baatil se nikle hakiman-e-sham-e-gham

aaj to saqi mujhe bas jam-e-KHali chahiye

aansuon se bhar chuka hai martaban-e-sham-e-gham

panchhiyon ne apne apne ghonslon mein li panah

suna-suna paD gaya hai aasman-e-sham-e-gham

tishnagi aawargi KHana-KHarabi bekali

hai bahut wus'at liye ye KHandan-e-sham-e-gham

der tak karte rahe baaten teri taswir se

aur karte 'nazr' kis ko raazdan-e-sham-e-gham