ہو گئے سارے بام و در تقسیم

ہو گئے سارے بام و در تقسیم

کس طرح ہو گیا یہ گھر تقسیم

باغ میں اب رہا ہے کیا باقی

ہو چکے سارے جب ثمر تقسیم

کس قدر مطمئن ہے وہ سردار

کر کے سب اپنا درد سر تقسیم

تھا مرے پاس جو بھی سرمایہ

ہو گیا سب ادھر ادھر تقسیم

چاک پر رکھ کے میری مٹی کو

کر رہا ہے وہ کوزہ گر تقسیم

اب سمندر میں اشتعال کہاں

رفتہ رفتہ ہوئے بھنور تقسیم

دشمنی خود ہی مول لی ہم نے

دوستوں میں کیا ہنر تقسیم

آگ سے کیا بچیں گے گھر ان کے

کرتے پھرتے ہیں جو شرر تقسیم