ہو گیا عاشق کسی کا روئے تاباں دیکھ کر

ہو گیا عاشق کسی کا روئے تاباں دیکھ کر

پھنس گیا ہوں میں کسی کی زلف پیچاں دیکھ کر

کیوں تجھے اللہ نے ایسا بنایا سنگ دل

بات بھی ظالم نہ پوچھی مجھ کو گریاں دیکھ کر

ایک دن مجھ کو نظر وہ خواب میں جو آ گئے

چشم روشن ہو گئی حسن فراواں دیکھ کر

ابروئے پر خم کی چلتی ہے مرے سینہ پہ تیغ

تیر لگتے ہیں جگر پر نوک مژگاں دیکھ کر

ہے عزیزؔ اب شکر وہ گل رو سخن سن کر ترا

قدر کچھ کرنے لگا تجھ کو غزل خواں دیکھ کر