ho gaya hai ek ek pal kaTna bhaari mujhe

ho gayā hai ek ik pal kāTnā bhārī mujhe

maar degī zindagānī kī girāñ-bārī mujhe

dar-ba-dar phir phir ke ḳhud apne se nafrat ho ga.ī

khokhlā sā kar gayā hai ranj-e-bekārī mujhe

itnā kuchh dekhā ki sab kuchh ek sā lagne lagā

kar gayā hai vaqt mahsūsāt se 'aarī mujhe

maiñ siyah malbūs guzre vaqt kā huuñ mātamī

ziist ne sauñpī hai maazī kī azā-dārī mujhe

ek ik kar ke kaTe bāhar ke saare rābte

kar ga.ī tanhā mirī sochoñ kī bīmārī mujhe

jī meñ aatā hai bikhar kar dahr bhar meñ phail jā.ūñ

qabr lagtī hai badan kī chār-dīvārī mujhe

tū nazar aayā to jangal zaat kā jal jā.egā

raakh kar degī tirī ḳhvāhish kī chingārī mujhe

roz o shab rahtā huuñ gum-sum aur mutafakkir 'riyāz'

karnī hai kis imtihāñ kī jaane tayyārī mujhe

ho gaya hai ek ek pal kaTna bhaari mujhe

mar degi zindagani ki giran-bari mujhe

dar-ba-dar phir phir ke KHud apne se nafrat ho gai

khokhla sa kar gaya hai ranj-e-bekari mujhe

itna kuchh dekha ki sab kuchh ek sa lagne laga

kar gaya hai waqt mahsusat se 'ari mujhe

main siyah malbus guzre waqt ka hun matami

zist ne saunpi hai mazi ki aza-dari mujhe

ek ek kar ke kaTe bahar ke sare rabte

kar gai tanha meri sochon ki bimari mujhe

ji mein aata hai bikhar kar dahr bhar mein phail jaun

qabr lagti hai badan ki chaar-diwari mujhe

tu nazar aaya to jangal zat ka jal jaega

rakh kar degi teri KHwahish ki chingari mujhe

roz o shab rahta hun gum-sum aur mutafakkir 'riyaz'

karni hai kis imtihan ki jaane tayyari mujhe