ho gaya hal zindagi ka masala jo mujh mein tha

ho gayā hal zindagī kā mas.ala jo mujh meñ thā

ḳhāmushī se ik parinda uḌ gayā jo mujh meñ thā

‘aks-andar-‘aks ḳhud to dekhtā rahtā thā kaun

ā.ina-dar-ā.ina vo kaun thā jo mujh meñ thā

apne kāñdhe par uThā.e be-karāñ ġham kī salīb

chal diyā be-samtiyoñ meñ qāfila jo mujh meñ thā

vaqt ke ḳheme se bāhar kaun aa kar dekhtā

mausamoñ kā vo sulagtā silsila jo mujh meñ thā

jis kā saaya duur kar detā thā din-bhar kī thakan

vo shajar pahle to sūkhā phir jalā jo mujh meñ thā

muztarib lamhāt ko taskīn dene ke liye

maiñ ne ḳhud hī toḌ Daalā aa.ina jo mujh meñ thā

kis ne sochā thā vahī kaḌvā dhuāñ ban jā.egā

sabz peḌoñ kā ghanerā silsila jo mujh meñ thā

shab ke sannāTe meñ suntā thā jise maiñ sub.h tak

'rind' vo karb-e-anā kā shor thā jo mujh meñ thā

ho gaya hal zindagi ka masala jo mujh mein tha

KHamushi se ek parinda uD gaya jo mujh mein tha

‘aks-andar-‘aks KHud to dekhta rahta tha kaun

aaina-dar-aina wo kaun tha jo mujh mein tha

apne kandhe par uThae be-karan gham ki salib

chal diya be-samtiyon mein qafila jo mujh mein tha

waqt ke KHeme se bahar kaun aa kar dekhta

mausamon ka wo sulagta silsila jo mujh mein tha

jis ka saya dur kar deta tha din-bhar ki thakan

wo shajar pahle to sukha phir jala jo mujh mein tha

muztarib lamhat ko taskin dene ke liye

main ne KHud hi toD Dala aaina jo mujh mein tha

kis ne socha tha wahi kaDwa dhuan ban jaega

sabz peDon ka ghanera silsila jo mujh mein tha

shab ke sannaTe mein sunta tha jise main subh tak

'rind' wo karb-e-ana ka shor tha jo mujh mein tha