ہو گیا حل زندگی کا مسئلہ جو مجھ میں تھا

ہو گیا حل زندگی کا مسئلہ جو مجھ میں تھا

خامشی سے اک پرندہ اڑ گیا جو مجھ میں تھا

عکس اندر عکس خود تو دیکھتا رہتا تھا کون

آئنہ در آئنہ وہ کون تھا جو مجھ میں تھا

اپنے کاندھے پر اٹھائے بے کراں غم کی صلیب

چل دیا بے سمتیوں میں قافلہ جو مجھ میں تھا

وقت کے خیمے سے باہر کون آ کر دیکھتا

موسموں کا وہ سلگتا سلسلہ جو مجھ میں تھا

جس کا سایہ دور کر دیتا تھا دن بھر کی تھکن

وہ شجر پہلے تو سوکھا پھر جلا جو مجھ میں تھا

مضطرب لمحات کو تسکین دینے کے لیے

میں نے خود ہی توڑ ڈالا آئنہ جو مجھ میں تھا

کس نے سوچا تھا وہی کڑوا دھواں بن جائے گا

سبز پیڑوں کا گھنیرا سلسلہ جو مجھ میں تھا

شب کے سناٹے میں سنتا تھا جسے میں صبح تک

رندؔ وہ کرب انا کا شور تھا جو مجھ میں تھا