ho gaya ishq ka aazar KHuda KHair kare

ho gayā ishq kā āzār ḳhudā ḳhair kare

hai musībat meñ dil-e-zār ḳhudā ḳhair kare

jaan bachtī nazar aatī nahīñ apnī mujh ko

mujh se barham hai mirā yaar ḳhudā ḳhair kare

be-ḳhabar thā vo mirī hālat-e-bad se lekin

in dinoñ hai vo ḳhabar-dār ḳhudā ḳhair kare

dil se us but ke utar kar kahīñ apnā jiinā

ho na jaa.e mujhe dushvār ḳhudā ḳhair kare

haa.e vo dil jise hāsil thā kabhī vasl-e-habīb

hijr meñ ab hai giraftār ḳhudā ḳhair kare

us kī qismat hai sañbhal jaa.e jo bīmār-e-firāq

varna achchhe nahīñ āsār ḳhudā ḳhair kare

yuuñ hī kyā kam thī bhalā āriz-e-jānāñ kī bahār

us pe ye kasrat-e-anvār ḳhudā ḳhair kare

dekh kar husn-e-dil-afroz ko us ke ai dil

yahī kahtā huuñ maiñ har baar ḳhudā ḳhair kare

dekhne ko bhī jo vo jurm batāte haiñ to haañ

dekhne kā huuñ gunahgār ḳhudā ḳhair kare

baat kyā hai ki mirā haal to abtar thā hī

aap kā haal bhī hai zaar ḳhudā ḳhair kare

kasrat-e-shauq se vo dil ki jo thā ḳhūgar-e-jaur

lutf kā ab hai talabgār ḳhudā ḳhair kare

ab to us shoḳh ne vo ruup nikālā hai 'jalīl'

ek aalam hai ḳharīdār ḳhudā ḳhair kare

ho gaya ishq ka aazar KHuda KHair kare

hai musibat mein dil-e-zar KHuda KHair kare

jaan bachti nazar aati nahin apni mujh ko

mujh se barham hai mera yar KHuda KHair kare

be-KHabar tha wo meri haalat-e-bad se lekin

in dinon hai wo KHabar-dar KHuda KHair kare

dil se us but ke utar kar kahin apna jina

ho na jae mujhe dushwar KHuda KHair kare

hae wo dil jise hasil tha kabhi wasl-e-habib

hijr mein ab hai giraftar KHuda KHair kare

us ki qismat hai sanbhal jae jo bimar-e-firaq

warna achchhe nahin aasar KHuda KHair kare

yun hi kya kam thi bhala aariz-e-jaanan ki bahaar

us pe ye kasrat-e-anwar KHuda KHair kare

dekh kar husn-e-dil-afroz ko us ke ai dil

yahi kahta hun main har bar KHuda KHair kare

dekhne ko bhi jo wo jurm batate hain to han

dekhne ka hun gunahgar KHuda KHair kare

baat kya hai ki mera haal to abtar tha hi

aap ka haal bhi hai zar KHuda KHair kare

kasrat-e-shauq se wo dil ki jo tha KHugar-e-jaur

lutf ka ab hai talabgar KHuda KHair kare

ab to us shoKH ne wo rup nikala hai 'jalil'

ek aalam hai KHaridar KHuda KHair kare