ہو گیا جس دن سے اپنا دل اداس

ہو گیا جس دن سے اپنا دل اداس

ہو گئی دنیا کی ہر محفل اداس

داغ ہائے یاس سے ہے دل اداس

شمع محفل سے ہوئی محفل اداس

مرنے والے جتنے تھے کیا مر گئے

پھر رہا ہے آج کیوں قاتل اداس

دست قاتل میں حنا ہے خوں نہیں

اس لئے ہے شوخیٔ قاتل اداس

پھیر لی کس نے محبت کی نگاہ

ہو رہا ہے کیوں ہمارا دل اداس

وقت آخر کیوں نہ ہو افسردگی

صبح کو ہو جاتی ہے محفل اداس

بیکسی گور غریباں کی نہ پوچھ

اف ہے کٹتی آخری منزل اداس

آئے گا ہاں وہ ستم گر آئے گا

ہو نہ اتنا مضطرؔ بے دل اداس