ہو گیا سب خاک مضطر راہ پروانہ رہی

ہو گیا سب خاک مضطر راہ پروانہ رہی

بزم میں روشن سحر تک جان جانانہ رہی

حیثیت کیا اور حقیقت کیا بھلا اس خاک کی

اس کے ہر نقش قدم پر پھر بھی نذرانہ رہی

پیاس کا ظرف ایسے کھل جائے گا کب معلوم تھا

تشنگی جام و سبو تک پیر مے خانہ رہی

کی تخیل نے مرے پیکر تراشی اس قدر

دل صنم خانہ رہا آنکھ آئنہ خانہ رہی

کم نہ تھی مینائے ہستی میں مئے جلوہ مگر

تشنہ کامی ہی حیات نو کا پیمانہ رہی

روز اول سے ابد تک آپ یکساں رہ گئی

رند تھی اپنی طبیعت یوں ہی رندانہ رہی

تم حقیقت پوچھتے ہو عشق کوثرؔ کی سنو

دشت و صحرا کی کہانی اپنا افسانہ رہی