ho gaya sab KHak muztar rah-e-parwana rahi

ho gayā sab ḳhaak muztar rāh-e-parvāna rahī

bazm meñ raushan sahar tak jān-e-jānāna rahī

haisiyat kyā aur haqīqat kyā bhalā is ḳhaak kī

us ke har naqsh-e-qadam par phir bhī nazrāna rahī

pyaas kā zarf aise khul jā.egā kab ma.alūm thā

tishnagī jām-o-subū tak pīr-e-mai-ḳhāna rahī

kī taḳhayyul ne mire paikar-tarāshī is qadar

dil sanam-ḳhāna rahā aañkh ā.ina-ḳhāna rahī

kam na thī mīnā-e-hastī meñ mai-e-jalva magar

tishna-kāmī hī hayāt-e-nau kā paimāna rahī

roz-e-avval se abad tak aap yaksāñ rah ga.ī

rind thī apnī tabī.at yuuñ hī rindāna rahī

tum haqīqat pūchhte ho ishq 'kausar' kī suno

dasht-o-sahrā kī kahānī apnā afsāna rahī

ho gaya sab KHak muztar rah-e-parwana rahi

bazm mein raushan sahar tak jaan-e-jaanana rahi

haisiyat kya aur haqiqat kya bhala is KHak ki

us ke har naqsh-e-qadam par phir bhi nazrana rahi

pyas ka zarf aise khul jaega kab malum tha

tishnagi jam-o-subu tak pir-e-mai-KHana rahi

ki taKHayyul ne mere paikar-tarashi is qadar

dil sanam-KHana raha aankh aaina-KHana rahi

kam na thi mina-e-hasti mein mai-e-jalwa magar

tishna-kaami hi hayat-e-nau ka paimana rahi

roz-e-awwal se abad tak aap yaksan rah gai

rind thi apni tabiat yun hi rindana rahi

tum haqiqat puchhte ho ishq 'kausar' ki suno

dasht-o-sahra ki kahani apna afsana rahi