ho gaya un se hamein pyar KHuda KHair kare

ho gayā un se hameñ pyaar ḳhudā ḳhair kare

karne vaale haiñ ham iz.hār ḳhudā ḳhair kare

aaj aanā thā unheñ shaam Dhalī jaatī hai

dil huā jaatā hai bezār ḳhudā ḳhair kare

vo kisī aur ke hamrāh nazar aate haiñ

bevafā.ī ke haiñ āsār ḳhudā ḳhair kare

jeb ḳhālī hai mirī saath meñ bachche haiñ mire

aur khilaunoñ kā hai bāzār ḳhudā ḳhair kare

dekhne vaale sabhī dekh ke kahte haiñ yahī

mar na jaa.e tirā bīmār ḳhudā ḳhair kare

ye jo is daur ke insān ḳhudā haiñ ḳhud meñ

ye qayāmat ke haiñ āsār ḳhudā ḳhair kare

hazrat-e-'saif' mohabbat kā nasha ho jin par

un ko samjhānā hai be-kār ḳhudā ḳhair kare

ho gaya un se hamein pyar KHuda KHair kare

karne wale hain hum izhaar KHuda KHair kare

aaj aana tha unhen sham Dhali jati hai

dil hua jata hai bezar KHuda KHair kare

wo kisi aur ke hamrah nazar aate hain

bewafai ke hain aasar KHuda KHair kare

jeb KHali hai meri sath mein bachche hain mere

aur khilaunon ka hai bazar KHuda KHair kare

dekhne wale sabhi dekh ke kahte hain yahi

mar na jae tera bimar KHuda KHair kare

ye jo is daur ke insan KHuda hain KHud mein

ye qayamat ke hain aasar KHuda KHair kare

hazrat-e-'saif' mohabbat ka nasha ho jin par

un ko samjhana hai be-kar KHuda KHair kare