ho gaya zaKHm mere dil ka hara sham Dhale

ho gayā zaḳhm mire dil kā harā shaam Dhale

yaad ne aa ke tirī chheḌ diyā shaam Dhale

lamha lamha mire nazdīk chalī aatī hai

jaane vaale tire qadmoñ kī sadā shaam Dhale

phir ḳhayāloñ meñ samāyā tirā chandan sā badan

phir mahak uTThī hai vīrān fazā shaam Dhale

mere ehsās pe chhā.ī haiñ ghanerī zulfeñ

jaane kis des se aa.ī hai ghaTā shaam Dhale

hāl-e-bīmār ḳhudā jaane sahar tak kyā ho

chārāgar karne lagā ḳhud hī duā shaam Dhale

maar Daale na kahīñ talḳhī-e-hastī paḌh kar

sāqiyā aur pilā aur pilā shaam Dhale

vo nikal aa.eñ idhar bhuul ke shāyad 'tālib'

ham jalāte haiñ sar-e-rāh diyā shaam Dhale

ho gaya zaKHm mere dil ka hara sham Dhale

yaad ne aa ke teri chheD diya sham Dhale

lamha lamha mere nazdik chali aati hai

jaane wale tere qadmon ki sada sham Dhale

phir KHayalon mein samaya tera chandan sa badan

phir mahak uTThi hai viran faza sham Dhale

mere ehsas pe chhai hain ghaneri zulfen

jaane kis des se aai hai ghaTa sham Dhale

haal-e-bimar KHuda jaane sahar tak kya ho

chaaragar karne laga KHud hi dua sham Dhale

mar Dale na kahin talKHi-e-hasti paDh kar

saqiya aur pila aur pila sham Dhale

wo nikal aaen idhar bhul ke shayad 'talib'

hum jalate hain sar-e-rah diya sham Dhale