ho imtihan-e-wafa hashr tak to aar nahin

ho imtihān-e-vafā hashr tak to aar nahīñ

mirī janāb meñ nākāmiyoñ ko baar nahīñ

qabā-e-hastī-e-bātil jo taar taar nahīñ

to ai dil ahl-e-junūñ meñ tirā shumār nahīñ

hai shart jalva-gah-e-nāz meñ adab lekin

nigāh bas meñ nahīñ dil pe iḳhtiyār nahīñ

sunā hai jab se sar-e-hashr jalva-gar hoge

vo kis kā dil hai ki marhūn-e-intizār nahīñ

kabhī karam hai sabā kā kabhī ināyat-e-barq

qafas-nasīb ko zindāñ meñ bhī qarār nahīñ

na bāġhbāñ kā gila hai na shikva-e-sayyād

samajh liyā hai ki taqdīr meñ bahār nahīñ

milī hameñ vo salāmat-ravī mohabbat meñ

ki ab kisī kī adāvat bhī nāgavār nahīñ

ma.āl-e-ābla-pā.ī ayaañ hai us se rashīd

ki tishna mere lahū kī zabān-e-ḳhār nahīñ

ho imtihan-e-wafa hashr tak to aar nahin

meri janab mein nakaamiyon ko bar nahin

qaba-e-hasti-e-baatil jo tar tar nahin

to ai dil ahl-e-junun mein tera shumar nahin

hai shart jalwa-gah-e-naz mein adab lekin

nigah bas mein nahin dil pe iKHtiyar nahin

suna hai jab se sar-e-hashr jalwa-gar hoge

wo kis ka dil hai ki marhun-e-intizar nahin

kabhi karam hai saba ka kabhi inayat-e-barq

qafas-nasib ko zindan mein bhi qarar nahin

na baghban ka gila hai na shikwa-e-sayyaad

samajh liya hai ki taqdir mein bahaar nahin

mili hamein wo salamat-rawi mohabbat mein

ki ab kisi ki adawat bhi nagawar nahin

maal-e-abla-pai ayan hai us se rashid

ki tishna mere lahu ki zaban-e-KHar nahin