ho jaega mujhe bhi nazara kabhi kabhi

ho jā.egā mujhe bhī nazārā kabhī kabhī

aaya karo idhar bhī ḳhudārā kabhī kabhī

hasrat rahī ye dil meñ ki ho jaa.e dosto

ulfat bharī nazar kā ishāra kabhī kabhī

chupke se ham ne bāda-e-zahrāb pī liyā

ye ishq meñ kiyā hai gavārā kabhī kabhī

hotī rahī haiñ ġharq kināre ye kashtiyāñ

maujoñ meñ bhī milā hai kinārā kabhī kabhī

ghabrā ke nabz-e-gardish-e-daurāñ Thahar ga.ī

jis vaqt ham ne un ko pukārā kabhī kabhī

hasrat se har kisī kī taraf dekhtā huuñ maiñ

aatā hai jab ḳhayāl tumhārā kabhī kabhī

'rāhī' ḳhafā haiñ ham se vo lekin karam ye hai

rakhte haiñ vo ḳhayāl hamārā kabhī kabhī

ho jaega mujhe bhi nazara kabhi kabhi

aaya karo idhar bhi KHudara kabhi kabhi

hasrat rahi ye dil mein ki ho jae dosto

ulfat bhari nazar ka ishaara kabhi kabhi

chupke se hum ne baada-e-zahrab pi liya

ye ishq mein kiya hai gawara kabhi kabhi

hoti rahi hain gharq kinare ye kashtiyan

maujon mein bhi mila hai kinara kabhi kabhi

ghabra ke nabz-e-gardish-e-dauran Thahar gai

jis waqt hum ne un ko pukara kabhi kabhi

hasrat se har kisi ki taraf dekhta hun main

aata hai jab KHayal tumhaara kabhi kabhi

'rahi' KHafa hain hum se wo lekin karam ye hai

rakhte hain wo KHayal hamara kabhi kabhi