ho jaen kisi ke jo kabhi yar munafiq

ho jaa.eñ kisī ke jo kabhī yaar munāfiq

samjho ki hue haiñ dar-o-dīvār munāfiq

ban jaatā hai kaise koī sālār munāfiq

ye baat samajhne ko hai darkār munāfiq

mumkin thā kabhī un ko maiñ ḳhātir meñ na laatā

hote jo muqābil mire do-chār munāfiq

un ko kisī bāzār se laanā nahīñ paḌtā

yāroñ meñ hī mil jaate haiñ tayyār munāfiq

nāpaid huā jaatā hai iḳhlās yahāñ par

sardār munāfiq hai sar-e-dār munāfiq

jo shaḳhs munāfiq hai munāfiq hī rahegā

ik baar munāfiq ho yā sau baar munāfiq

sachchā.ī zabāñ kaaT ke chup-chāp khaḌī hai

shohrat kī bulandī pe haiñ aḳhbār munāfiq

likkhā hai munāfiq ne munāfiq kā fasāna

is vāste rakkhe haiñ ye kirdār munāfiq

jis shahr kī buniyād munāfiq ne ho rakkhī

qaa.em vahāñ ho jaatī hai sarkār munāfiq

muḳhlis haiñ jo khul kar mirī tā.īd kareñge

bhaḌkeñge ye sun kar mire ash.ār munāfiq

'dānish' ye haqīqat hai bhale maano na maano

iḳhlās kā tai karte haiñ me.aar munāfiq

ho jaen kisi ke jo kabhi yar munafiq

samjho ki hue hain dar-o-diwar munafiq

ban jata hai kaise koi salar munafiq

ye baat samajhne ko hai darkar munafiq

mumkin tha kabhi un ko main KHatir mein na lata

hote jo muqabil mere do-chaar munafiq

un ko kisi bazar se lana nahin paDta

yaron mein hi mil jate hain tayyar munafiq

napaid hua jata hai iKHlas yahan par

sardar munafiq hai sar-e-dar munafiq

jo shaKHs munafiq hai munafiq hi rahega

ek bar munafiq ho ya sau bar munafiq

sachchai zaban kaT ke chup-chap khaDi hai

shohrat ki bulandi pe hain aKHbar munafiq

likkha hai munafiq ne munafiq ka fasana

is waste rakkhe hain ye kirdar munafiq

jis shahr ki buniyaad munafiq ne ho rakkhi

qaem wahan ho jati hai sarkar munafiq

muKHlis hain jo khul kar meri taid karenge

bhaDkenge ye sun kar mere ashaar munafiq

'danish' ye haqiqat hai bhale mano na mano

iKHlas ka tai karte hain mear munafiq