ho jis qadar ki tujhse ai pur-jafa jafa kar

ho jis qadar ki tujh se ai pur-jafā jafā kar

kahtā huuñ maiñ bhī tujh se ai bā-vafā vafā kar

bait-us-sanam meñ jā kar hamdam ba-rabb-e-ka.aba

laayā huuñ us sanam ko ghar tak ḳhudā ḳhudā kar

gauhar jo ashk ke haiñ kuchh chashm ke sadaf meñ

ġhaltāñ na ḳhaak meñ kar aañsū bahā bahā kar

marte haiñ ham to lekin sun terī aamad aamad

ummīd ne rakhā hai ab tak jalā jalā kar

tujh ko patang uḌāte dekhā jo 'āshiqoñ ne

kaT mar ke baiThe aksar ghar-var luTā luTā kar

sad-chāk dil kā honā har sub.h-dam hamārā

gul se tū kah rahī hai bulbul hañsā hañsā kar

aatā hai vo sharābī khāne kabāb dil kā

kahtā hai jhūTī bāteñ kyā kyā chabā chabā kar

saaqī mu'āf rakkho gustāḳhiyāñ hamārī

be-ḳhud kiyā nashe meñ tū ne pilā pilā kar

bose kā likh ke nusḳha yāqūtī-e-laboñ se

bīmār-e-ishq terā hai be-davā davā kar

har sub.h chaak ho hai nāseh mirā garebāñ

har shaam tū rakkhe hai nāhaq silā silā kar

aur ik ġhazal 'muhib' kah bar-qaul 'mīr'-sāhib

auroñ se de ishāre ham se chhupā chhupā kar

ho jis qadar ki tujh se ai pur-jafa jafa kar

kahta hun main bhi tujh se ai ba-wafa wafa kar

bait-us-sanam mein ja kar hamdam ba-rabb-e-kaba

laya hun us sanam ko ghar tak KHuda KHuda kar

gauhar jo ashk ke hain kuchh chashm ke sadaf mein

ghaltan na KHak mein kar aansu baha baha kar

marte hain hum to lekin sun teri aamad aamad

ummid ne rakha hai ab tak jala jala kar

tujh ko patang uDate dekha jo 'ashiqon ne

kaT mar ke baiThe aksar ghar-war luTa luTa kar

sad-chaak dil ka hona har subh-dam hamara

gul se tu kah rahi hai bulbul hansa hansa kar

aata hai wo sharabi khane kabab dil ka

kahta hai jhuTi baaten kya kya chaba chaba kar

saqi mu'af rakkho gustaKHiyan hamari

be-KHud kiya nashe mein tu ne pila pila kar

bose ka likh ke nusKHa yaquti-e-labon se

bimar-e-ishq tera hai be-dawa dawa kar

har subh chaak ho hai naseh mera gareban

har sham tu rakkhe hai nahaq sila sila kar

aur ek ghazal 'muhib' kah bar-qaul 'mir'-sahib

auron se de ishaare hum se chhupa chhupa kar