ho kash wafa wada-e-farda-e-qayamat

ho kaash vafā vāda-e-fardā-e-qayāmat

aa.egī magar dekhiye kab aa.e qayāmat

suntā huuñ ki hañgāma-e-dīdār bhī hogā

ek aur qayāmat hai ye bālā-e-qayāmat

ham dil ko in alfāz se karte haiñ muḳhātab

ai jalva-gah-e-anjuman-ārā-e-qayāmat

allāh bachā.e ġham-e-furqat vo balā hai

munkir kī nigāhoñ pe bhī chhā jaa.e qayāmat

'fānī' ye magar rāh-e-mohabbat kī zamīñ hai

har zarre meñ hai vusat-e-sahrā-e-qayāmat

ho kash wafa wada-e-farda-e-qayamat

aaegi magar dekhiye kab aae qayamat

sunta hun ki hangama-e-didar bhi hoga

ek aur qayamat hai ye baala-e-qayamat

hum dil ko in alfaz se karte hain muKHatab

ai jalwa-gah-e-anjuman-ara-e-qayamat

allah bachae gham-e-furqat wo bala hai

munkir ki nigahon pe bhi chha jae qayamat

'fani' ye magar rah-e-mohabbat ki zamin hai

har zarre mein hai wusat-e-sahra-e-qayamat