ho kaise kisi wade ka iqrar registered

ho kaise kisī vā'de kā iqrār registered

jab ḳhud hī nahīñ hai mirī sarkār registered

kyā shaiḳh o brahman pe kare koī bharosa

tasbīh registered na zunnār registered

is jumbish chitvan se koī bach nahīñ saktā

qātil kā mire hotā hai har vaar registered

chāhe bhī to ab tark-e-taġhāful nahīñ mumkin

hai dost kī ġhaflat kā ye āzār registered

muddat huī dam toḌ diyā amn-o-amāñ ne

ab ho ga.e ye hashr ke āsār registered

ho paayā tire husn-e-talavvun ke karam se

iqrār registered na inkār registered

duniyā hai mirī teġh kā maane hue lohā

hai saare zamāne meñ ye talvār registered

tujh par tire har fe'l par uThne lagī uñglī

tū ḳhud hai gazetted tirā kirdār registered

ab husn-faroshī ke liye misr ke badle

bhārat meñ hai naḳhḳhās kā bāzār registered

tū laakh kare chehra-e-zebā kī numā.ish

hogā na tire husn kā me'yār registered

chaḌhtā hai irāda mirā parvān tah-e-teġh

hotā hai mirā 'azm sar-e-dār registered

baiThā huā sikka hai mirī fikr-e-suḳhan kā

ai 'shauq' na hoñ kyuuñ mire ash’ār registered

ho kaise kisi wa'de ka iqrar registered

jab KHud hi nahin hai meri sarkar registered

kya shaiKH o brahman pe kare koi bharosa

tasbih registered na zunnar registered

is jumbish chitwan se koi bach nahin sakta

qatil ka mere hota hai har war registered

chahe bhi to ab tark-e-taghaful nahin mumkin

hai dost ki ghaflat ka ye aazar registered

muddat hui dam toD diya amn-o-aman ne

ab ho gae ye hashr ke aasar registered

ho paya tere husn-e-talawwun ke karam se

iqrar registered na inkar registered

duniya hai meri tegh ka mane hue loha

hai sare zamane mein ye talwar registered

tujh par tere har fe'l par uThne lagi ungli

tu KHud hai gazetted tera kirdar registered

ab husn-faroshi ke liye misr ke badle

bhaarat mein hai naKHKHas ka bazar registered

tu lakh kare chehra-e-zeba ki numaish

hoga na tere husn ka me'yar registered

chaDhta hai irada mera parwan tah-e-tegh

hota hai mera 'azm sar-e-dar registered

baiTha hua sikka hai meri fikr-e-suKHan ka

ai 'shauq' na hon kyun mere ash’ar registered