ho kaise na hum donon ka andaz-e-bayan aur

ho kaise na ham donoñ kā andāz-e-bayāñ aur

hai merī zabāñ aur farañgī kī zabāñ aur

chāho ki na aa.e jo mire lab pe fuġhāñ aur

maaro na vahīñ choT ki hai dard-e-jahāñ aur

yā-rab but-e-ḳhush-fām se apnī nahīñ bantī

de jild use aur jo de mujh ko na jaañ aur

tū sab kā ḳhudā hai to mujhe itnā batā de

ye kaisī ḳhudā.ī hai yahāñ aur vahāñ aur

in sho.aloñ se to jal na sakā merā nasheman

ab dekhiye kyā kartī hai ye barq-e-tapāñ aur

ik ghūñT pe mabnī hai tire rind kī duniyā

is jaam meñ bas itnī sī ai pīr-e-muġhāñ aur

shaidā.ī huuñ 'ġhālib' kā mujhe kahte haiñ 'betāb'

juz is ke nahīñ koī mirā nām-o-nishāñ aur

ho kaise na hum donon ka andaz-e-bayan aur

hai meri zaban aur farangi ki zaban aur

chaho ki na aae jo mere lab pe fughan aur

maro na wahin choT ki hai dard-e-jahan aur

ya-rab but-e-KHush-fam se apni nahin banti

de jild use aur jo de mujh ko na jaan aur

tu sab ka KHuda hai to mujhe itna bata de

ye kaisi KHudai hai yahan aur wahan aur

in shoalon se to jal na saka mera nasheman

ab dekhiye kya karti hai ye barq-e-tapan aur

ek ghunT pe mabni hai tere rind ki duniya

is jam mein bas itni si ai pir-e-mughan aur

shaidai hun 'ghaalib' ka mujhe kahte hain 'betab'

juz is ke nahin koi mera nam-o-nishan aur