ہو کر کسی کے عشق میں دیوانہ دیکھیے

ہو کر کسی کے عشق میں دیوانہ دیکھیے

لو شمع دے رہی ہے کہ پروانہ دیکھیے

لٹنے کے باوجود بھی دیتا رہا دعا

دل کا چمن ہے کتنا فقیرانہ دیکھیے

آپ آ گئے ہیں لالہ و گل کے دیار میں

ہر برگ گل پہ ہے مرا افسانہ دیکھیے

پیر مغاں خموش ہے ساقی ہے دم بخود

اب محتسب کے ہاتھ میں پیمانہ دیکھیے

سنتے تھے وہ چلے ہیں بسانے کو بستیاں

اک ایک شہر ہو گیا ویرانہ دیکھیے

دنیا پہ اتہام مناسب نہیں طفیلؔ

اپنی طرف بھی آپ حریفانہ دیکھیے