ho ke betab badal lete the aksar karwaT

ho ke betāb badal lete the aksar karvaT

ab ye hai zo.af ki qaabū se hai bāhar karvaT

hijr se baḌh ke shab-e-vasl aziyyat hai mujhe

ġhair kī yaad dilātī hai tirī har karvaT

riñd bīmār rahā mohtasib-e-shar.a se tez

is qadar jald are pheñk ke sāġhar karvaT

chuTkiyāñ hijr meñ letī hai shikan bistar kī

mere pahlū meñ chubho detī hai nashtar karvaT

shoḳhiyāñ haiñ ki bane hijr kī shab vasl kī raat

so rahe pher ke muñh aap badal kar karvaT

baiThnā un kā nazākat se dabā kar siina

phir ye kahnā ki na lenā tah-e-ḳhanjar karvaT

terī Thokar se na ulTe kahīñ vo taḳhta-e-qabr

le na ḳhvābīda koī fitna-e-mahshar karvaT

har taraf kāñTe bichhe haiñ shikan bistar ke

ham ko mushkil hai badalnā sar-e-bistar karvaT

unheñ muñh pher ke sone nahīñ detā huuñ 'riyāz'

vasl kī raat mujhe kyuuñ na ho dūbhar karvaT

ho ke betab badal lete the aksar karwaT

ab ye hai zoaf ki qabu se hai bahar karwaT

hijr se baDh ke shab-e-wasl aziyyat hai mujhe

ghair ki yaad dilati hai teri har karwaT

rind bimar raha mohtasib-e-shara se tez

is qadar jald are phenk ke saghar karwaT

chuTkiyan hijr mein leti hai shikan bistar ki

mere pahlu mein chubho deti hai nashtar karwaT

shoKHiyan hain ki bane hijr ki shab wasl ki raat

so rahe pher ke munh aap badal kar karwaT

baiThna un ka nazakat se daba kar sina

phir ye kahna ki na lena tah-e-KHanjar karwaT

teri Thokar se na ulTe kahin wo taKHta-e-qabr

le na KHwabida koi fitna-e-mahshar karwaT

har taraf kanTe bichhe hain shikan bistar ke

hum ko mushkil hai badalna sar-e-bistar karwaT

unhen munh pher ke sone nahin deta hun 'riyaz'

wasl ki raat mujhe kyun na ho dubhar karwaT