ہو کے اک روز پھر بہم ہم تم

ہو کے اک روز پھر بہم ہم تم

بانٹ لیں اس جہاں کا غم ہم تم

اب کوئی دل کسی سے ہو نہ جدا

عہد آ کر لیں کم سے کم ہم تم

پیار عنقا ہے اس زمانے میں

رکھ رہے ہیں بس اک بھرم ہم تم

ہو ہی جائے گا جان و دل کا حساب

پھر ہوئے گر کبھی بہم ہم تم

جاتے ڈرتا ہے جس طرف یہ جہاں

اب اٹھا لیں ادھر قدم ہم تم

متحد ہو تو اے چمن والو

توڑ دیں بازوئے ستم ہم تم

آؤ مل جل کے بانٹ لیں یارو

فکر دل فکر بیش و کم ہم تم

آج رسم وفا نبھا ڈالو

پھر کبھی ہوں نہ ہو بہم ہم تم

آج بھی واں گلاب کھلتے ہیں

کل ہوئے تھے جہاں بہم ہم تم