ho ke ek roz phir baham hum tum

ho ke ik roz phir baham ham tum

baañT leñ is jahāñ kā ġham ham tum

ab koī dil kisī se ho na judā

ahd aa kar leñ kam se kam ham tum

pyaar anqā hai is zamāne meñ

rakh rahe haiñ bas ik bharam ham tum

ho hī jā.egā jān-o-dil kā hisāb

phir hue gar kabhī baham ham tum

jaate Dartā hai jis taraf ye jahāñ

ab uThā leñ udhar qadam ham tum

muttahid ho to ai chaman vaalo

toḌ deñ bāzū-e-sitam ham tum

aao mil-jul ke baañT leñ yaaro

fikr-e-dil fikr-e-besh-o-kam ham tum

aaj rasm-e-vafā nibhā Daalo

phir kabhī hoñ na ho baham ham tum

aaj bhī vaañ gulāb khilte haiñ

kal hue the jahāñ baham ham tum

ho ke ek roz phir baham hum tum

banT len is jahan ka gham hum tum

ab koi dil kisi se ho na juda

ahd aa kar len kam se kam hum tum

pyar anqa hai is zamane mein

rakh rahe hain bas ek bharam hum tum

ho hi jaega jaan-o-dil ka hisab

phir hue gar kabhi baham hum tum

jate Darta hai jis taraf ye jahan

ab uTha len udhar qadam hum tum

muttahid ho to ai chaman walo

toD den bazu-e-sitam hum tum

aao mil-jul ke banT len yaro

fikr-e-dil fikr-e-besh-o-kam hum tum

aaj rasm-e-wafa nibha Dalo

phir kabhi hon na ho baham hum tum

aaj bhi wan gulab khilte hain

kal hue the jahan baham hum tum