ho kis tarah na hum ko har dam hawa-e-matlab

ho kis tarah na ham ko har dam havā-e-matlab

dekhā jo ḳhuub ham ne duniyā hai jā-e-matlab

jo gul-badan ki aayā āġhosh meñ hamāre

kuchh aur bū na niklī us meñ sivā.e matlab

ushshāq kī bhī ulfat ḳhālī nahīñ ġharaz se

marte haiñ ye bhī is par jis se barā.e matlab

koī kisī ke uupar ham ne fidā na dekhā

muñh par fidā haiñ lekin dil meñ fidā-e-matlab

matlab ke āshnā ko ho kis se āshnā.ī

kab āshnā kisī kā ho āshnā-e-matlab

gar bazm-e-raqs dekhī to vaañ bhī gosh-e-dil meñ

koī sadā na aa.ī ġhair-az-sadā-e-matlab

zer-e-falak to ham se jaatī nahīñ tamannā

haañ phir falak pe jāveñ jab ham se jā-e-matlab

vo aabrū ki jis par karte haiñ jaañ tasadduq

us ko bhī de chuke haiñ aksar barā.e matlab

jab harf-e-ābrū tak pahuñchā 'nazīr' phir to

kyā kahiye aisī jāgah jizya ki haa.e matlab

ho kis tarah na hum ko har dam hawa-e-matlab

dekha jo KHub hum ne duniya hai ja-e-matlab

jo gul-badan ki aaya aaghosh mein hamare

kuchh aur bu na nikli us mein siwae matlab

ushshaq ki bhi ulfat KHali nahin gharaz se

marte hain ye bhi is par jis se barae matlab

koi kisi ke upar hum ne fida na dekha

munh par fida hain lekin dil mein fida-e-matlab

matlab ke aashna ko ho kis se aashnai

kab aashna kisi ka ho aashna-e-matlab

gar bazm-e-raqs dekhi to wan bhi gosh-e-dil mein

koi sada na aai ghair-az-sada-e-matlab

zer-e-falak to hum se jati nahin tamanna

han phir falak pe jawen jab hum se ja-e-matlab

wo aabru ki jis par karte hain jaan tasadduq

us ko bhi de chuke hain aksar barae matlab

jab harf-e-abru tak pahuncha 'nazir' phir to

kya kahiye aisi jagah jizya ki hae matlab