ho na ruswa-e-zamana mah-e-kaamil ki tarah

ho na rusvā-e-zamāna mah-e-kāmil kī tarah

mere siine meñ raho aa ke mire dil kī tarah

tere darvāze pe ai ġhairat-e-lailā din-rāt

sar paTakte rahe ham parda-e-mahmil kī tarah

is qadar shauq-e-shahādat ne mujhe dauḌāyā

thak ga.e paañv mire bāzū-e-qātil kī tarah

sair nairangī-e-ālam kī nazar aa jaa.e

merī āñkhoñ meñ agar aa ke raho til kī tarah

ik nazar dekh le muñh pher ke o said-afgan

dil taḌaptā hai mirā tā.ir-e-bismil kī tarah

be-tire ai yam-e-ḳhūbī jo lage muñh se sharāb

chhāle paḌ jaa.eñ habāb-e-lab-e-sāhil kī tarah

vahshat-e-dil se ho kyā āshiq-e-gesū ko najāt

jāda-e-dasht lipaTte haiñ salāsil kī tarah

qadr jānoge mohabbat kī tab ai jān-e-jahāñ

tum bhī jab ranj uThāoge mire dil kī tarah

aap khul khele agar mujh se shab-e-vasl to kyā

na khulī dil kī girah uqda-e-mushkil kī tarah

rang laa.e jo mirā ḳhūn-e-tamannā 'vahbī'

dāman-e-hashr bane dāman-e-qātil kī tarah

ho na ruswa-e-zamana mah-e-kaamil ki tarah

mere sine mein raho aa ke mere dil ki tarah

tere darwaze pe ai ghairat-e-laila din-raat

sar paTakte rahe hum parda-e-mahmil ki tarah

is qadar shauq-e-shahadat ne mujhe dauDaya

thak gae panw mere bazu-e-qatil ki tarah

sair nairangi-e-alam ki nazar aa jae

meri aankhon mein agar aa ke raho til ki tarah

ek nazar dekh le munh pher ke o said-afgan

dil taDapta hai mera tair-e-bismil ki tarah

be-tire ai yam-e-KHubi jo lage munh se sharab

chhaale paD jaen habab-e-lab-e-sahil ki tarah

wahshat-e-dil se ho kya aashiq-e-gesu ko najat

jada-e-dasht lipaTte hain salasil ki tarah

qadr jaanoge mohabbat ki tab ai jaan-e-jahan

tum bhi jab ranj uThaoge mere dil ki tarah

aap khul khele agar mujh se shab-e-wasl to kya

na khuli dil ki girah uqda-e-mushkil ki tarah

rang lae jo mera KHun-e-tamanna 'wahbi'

daman-e-hashr bane daman-e-qatil ki tarah