ہو نہیں پائی ہے نقصاں کی تلافی اب تک

ہو نہیں پائی ہے نقصاں کی تلافی اب تک

بھول پائے نہیں گزرا ہوا ماضی اب تک

بس گئے شہر میں فطرت نہیں بدلی اب تک

ایسا لگتا ہے کہ انسان ہے وحشی اب تک

اب یہ جانا بھی کوئی جانا ہے جانے والے

ہے ترے ہونے کی ہر ایک نشانی اب تک

اور اب کیا اسے مردہ ہی بنا ڈالو گے

کم وہی کیا ہے جو کچھ دل پہ ہے گزری اب تک

وقت تھا کون سا لمحہ جو خطا کر بیٹھا

کیوں یہ جاری ہے تباہی پہ تباہی اب تک

تو نے مانگا ہی نہیں مانگنے والوں کی طرح

ورنہ رہتی نہیں خالی تری جھولی اب تک

اے قیامت تو ابھی دور ہی رہنا کچھ روز

ہم تو چڑھ پائے ہیں بس پہلی ہی سیڑھی اب تک

تیری محنت میں نہیں کوئی کمی اے جاویدؔ

ہو نہیں پائی ہے اللہ کی مرضی اب تک