ho pyas salamat mai-e-gulfam bahut hai

ho pyaas salāmat mai-e-gulfām bahut hai

mai-ḳhāna bahut saaqī bahut jaam bahut hai

in tāfta zulfoñ ko pareshāñ na karo tum

ai jān-e-sitam gardish-e-ayyām bahut hai

kyoñ tuur pe mauqūf ho bārān-e-tajallī

is jalva-e-tābāñ ke liye baam bahut hai

ik vo haiñ ki har zulm ravā un ke liye hai

ik aah bharī maiñ ne to kohrām bahut hai

āzādī-e-parvāz pe itrā nahīñ bulbul

gulshan kī fazāoñ meñ abhī daam bahut hai

kuchh soch ke amvāj-e-talātum meñ paḌā huuñ

ye sach hai ki sāhil pe to ārām bahut hai

āsān nahīñ jāda-e-irfān-e-mohabbat

har gaam rah-e-shauq meñ ib.hām bahut hai

kyoñ mujh ko sadā detā hai aflāk se hātif

is anjuman-e-gul meñ abhī kaam bahut hai

mat bech ise misr kā bāzār sajā kar

is yūsuf-e-hastī kā 'sahar' daam bahut hai

ho pyas salamat mai-e-gulfam bahut hai

mai-KHana bahut saqi bahut jam bahut hai

in tafta zulfon ko pareshan na karo tum

ai jaan-e-sitam gardish-e-ayyam bahut hai

kyon tur pe mauquf ho baran-e-tajalli

is jalwa-e-taban ke liye baam bahut hai

ek wo hain ki har zulm rawa un ke liye hai

ek aah bhari main ne to kohram bahut hai

aazadi-e-parwaz pe itra nahin bulbul

gulshan ki fazaon mein abhi dam bahut hai

kuchh soch ke amwaj-e-talatum mein paDa hun

ye sach hai ki sahil pe to aaram bahut hai

aasan nahin jada-e-irfan-e-mohabbat

har gam rah-e-shauq mein ibham bahut hai

kyon mujh ko sada deta hai aflak se hatif

is anjuman-e-gul mein abhi kaam bahut hai

mat bech ise misr ka bazar saja kar

is yusuf-e-hasti ka 'sahar' dam bahut hai