ho raha hai kya jahan mein ek nazar mat dekhiye

ho rahā hai kyā jahāñ meñ ik nazar mat dekhiye

pahle panne par hai jo bas vo ḳhabar mat dekhiye

duniyā ko tabdīl karne ke haiñ is meñ ḳhvāb bas

inqilābī huuñ mirā raḳht-e-safar mat dekhiye

pyaar se bigḌe bhī haiñ kuchh log ye maanā magar

ho davā lāzim to is ke bad-asar mat dekhiye

kyā ujaḌtā jā rahā hai is pe bhī rakkheñ nazar

sirf baste iiñT patthar ke nagar mat dekhiye

dekhnā hai ye ki bilkul Thiik ho apnī dishā

kitnī bhī chāhe ho pur-ḳham rahguzar mat dekhiye

sharm se mar jāoge insān haiñ gar aap ik

kis tarah karte haiñ ye muflis guzar mat dekhiye

chāhe ruk jaao kahīñ bhī taan do tambū kahīñ

pīchhe muḌ muḌ kar kabhī 'jānib' magar mat dekhiye

ho raha hai kya jahan mein ek nazar mat dekhiye

pahle panne par hai jo bas wo KHabar mat dekhiye

duniya ko tabdil karne ke hain is mein KHwab bas

inqilabi hun mera raKHt-e-safar mat dekhiye

pyar se bigDe bhi hain kuchh log ye mana magar

ho dawa lazim to is ke bad-asar mat dekhiye

kya ujaDta ja raha hai is pe bhi rakkhen nazar

sirf baste inT patthar ke nagar mat dekhiye

dekhna hai ye ki bilkul Thik ho apni disha

kitni bhi chahe ho pur-KHam rahguzar mat dekhiye

sharm se mar jaoge insan hain gar aap ek

kis tarah karte hain ye muflis guzar mat dekhiye

chahe ruk jao kahin bhi tan do tambu kahin

pichhe muD muD kar kabhi 'jaanib' magar mat dekhiye