ho rahe hain nama-o-paigham hanste bolte

ho rahe haiñ nāma-o-paiġhām hañste bolte

kaT rahī hai har sahar har shaam hañste bolte

mil rahe haiñ nit na.e in.aam hañste bolte

khā rahe haiñ aap ke dushnām hañste bolte

aap rusvā hoñ hamāre sāmne mumkin nahīñ

apne sar le leñge har ilzām hañste bolte

dil-lagī hī dil-lagī meñ kaam apnā ban gayā

aa gayā pahlū meñ vo gulfām hañste bolte

mausam-e-gul meñ hameñ rakhnā thā dil sayyād kā

ho ga.e ham ḳhud asīr-e-dām hañste bolte

bad-gumāñ the laakh tum ham se nasīb-e-dushmanāñ

phir bhī tum ham se barā.e-nām hañste bolte

ham na kahte the na suniye dil-jaloñ kī dāstāñ

ho ga.e kyuuñ larza-bar-andām hañste bolte

baat to kuchh bhī na thī haañ baat to kuchh bhī na thī

ho ga.e ham muft meñ bad-nām hañste bolte

gardish-e-ayyām kā shikva tujhe zebā nahīñ

aur le himmat se ai dil kaam hañste bolte

shādmānī muskurā.ī ḳhush-nasīboñ par to kyā

baat to jab thī ġham-o-ālām hañste bolte

ek ma.abad meñ makīñ haiñ ek muddat se magar

kyuuñ nahīñ asnām se asnām hañste bolte

bazm-e-mai meñ kyuuñ kisī ko jur.at-e-inkār ho

jab mile hāthoñ se un ke jaam hañste bolte

in meñ ye tafrīq kyuuñ hai ai mire parvardigār

kyuuñ nahīñ aapas meñ ḳhās-o-ām hañste bolte

bolte hañste guzārī ham ne saarī zindagī

kyuuñ na phir ham naza.a ke hañgām hañste bolte

thā dam-e-āḳhir tasavvur meñ jamāl-e-dil-nashīñ

ho gayā 'tālib' ba-ḳhair anjām hañste bolte

ho rahe hain nama-o-paigham hanste bolte

kaT rahi hai har sahar har sham hanste bolte

mil rahe hain nit nae inam hanste bolte

kha rahe hain aap ke dushnam hanste bolte

aap ruswa hon hamare samne mumkin nahin

apne sar le lenge har ilzam hanste bolte

dil-lagi hi dil-lagi mein kaam apna ban gaya

aa gaya pahlu mein wo gulfam hanste bolte

mausam-e-gul mein hamein rakhna tha dil sayyaad ka

ho gae hum KHud asir-e-dam hanste bolte

bad-guman the lakh tum hum se nasib-e-dushmanan

phir bhi tum hum se barae-nam hanste bolte

hum na kahte the na suniye dil-jalon ki dastan

ho gae kyun larza-bar-andam hanste bolte

baat to kuchh bhi na thi han baat to kuchh bhi na thi

ho gae hum muft mein bad-nam hanste bolte

gardish-e-ayyam ka shikwa tujhe zeba nahin

aur le himmat se ai dil kaam hanste bolte

shadmani muskurai KHush-nasibon par to kya

baat to jab thi gham-o-alam hanste bolte

ek mabad mein makin hain ek muddat se magar

kyun nahin asnam se asnam hanste bolte

bazm-e-mai mein kyun kisi ko jurat-e-inkar ho

jab mile hathon se un ke jam hanste bolte

in mein ye tafriq kyun hai ai mere parwardigar

kyun nahin aapas mein KHas-o-am hanste bolte

bolte hanste guzari hum ne sari zindagi

kyun na phir hum naza ke hangam hanste bolte

tha dam-e-aKHir tasawwur mein jamal-e-dil-nashin

ho gaya 'talib' ba-KHair anjam hanste bolte