ho ruh ke tain jism se kis tarah mohabbat

ho ruuh ke ta.iiñ jism se kis tarah mohabbat

taa.ir ko qafas se bhī kahīñ ho hai mohabbat

go zill-e-humā mat ho rahe sar pe hamāre

tā-hashr terā sāya-e-dīvār salāmat

atvār tire bā.is-e-āfāt-e-jahāñ haiñ

āsār tire haiñge sab āsār-e-qayāmat

sayyād na ab be-par-o-bāloñ ko tū ab chhoḌ

phir hasrat-e-gul degī hameñ saḳht aziyyat

asbāb jahāñ kī to dilā fikr na kar tū

hāsil nahīñ kuchh is meñ ba-juz ranj-o-mashaqqat

chhoḌūñgā na maiñ tujh ko tire ḳhat ke bhī aa.e

tū tab bhī na ho yaar to ye bhī mirī qismat

'tābāñ' tū sadā sair har ik gul kī kiyā kar

is gulshan-e-hastī kā nazārā hai ġhanīmat

ho ruh ke tain jism se kis tarah mohabbat

tair ko qafas se bhi kahin ho hai mohabbat

go zill-e-huma mat ho rahe sar pe hamare

ta-hashr tera saya-e-diwar salamat

atwar tere bais-e-afat-e-jahan hain

aasar tere hainge sab aasar-e-qayamat

sayyaad na ab be-par-o-baalon ko tu ab chhoD

phir hasrat-e-gul degi hamein saKHt aziyyat

asbab jahan ki to dila fikr na kar tu

hasil nahin kuchh is mein ba-juz ranj-o-mashaqqat

chhoDunga na main tujh ko tere KHat ke bhi aae

tu tab bhi na ho yar to ye bhi meri qismat

'taban' tu sada sair har ek gul ki kiya kar

is gulshan-e-hasti ka nazara hai ghanimat