ho shauq pur-KHulus to mane nahin hudud

ho shauq pur-ḳhulūs to maane nahīñ hudūd

dariyā ravāñ-davāñ hai kināroñ ke bāvajūd

hai dīdanī farāsat-e-hāzir kī ye numūd

ajsām tez-gām haiñ aur ruuh pur-jumūd

kab khul sakā hai aql pe ye rāz-e-hast-o-būd

fikr-o-nazar ke saath haiñ ehsās ke quyūd

āzādiyāñ vo saḳht haiñ zindāñ kī qaid se

jin meñ nigāh-o-fikr pe hoñ saikḌoñ quyūd

tū jān-e-zindagī hai tū unvān-e-zindagī

terī hī jalva-gāh hai kyā ġhaib kyā shuhūd

rindān-e-mai-kada bhī hue maslahat-shanās

ab ban gayā hai mai-kada bazm-e-ziyān-o-sūd

yārān-e-mai-kadā kī siyāsat na pūchhiye

ḳhatre meñ paḌ gayā hai ḳhud insān kā vajūd

ho shauq pur-KHulus to mane nahin hudud

dariya rawan-dawan hai kinaron ke bawajud

hai didani farasat-e-hazir ki ye numud

ajsam tez-gam hain aur ruh pur-jumud

kab khul saka hai aql pe ye raaz-e-hast-o-bud

fikr-o-nazar ke sath hain ehsas ke quyud

aazadiyan wo saKHt hain zindan ki qaid se

jin mein nigah-o-fikr pe hon saikDon quyud

tu jaan-e-zindagi hai tu unwan-e-zindagi

teri hi jalwa-gah hai kya ghaib kya shuhud

rindan-e-mai-kada bhi hue maslahat-shanas

ab ban gaya hai mai-kada bazm-e-ziyan-o-sud

yaran-e-mai-kada ki siyasat na puchhiye

KHatre mein paD gaya hai KHud insan ka wajud