ho wo amir-e-shahr ki bhuka faqir ho

ho vo amīr-e-shahr ki bhūkā faqīr ho

ḳhush-baḳht use kaheñge jo raushan zamīr ho

daulat se kab ḳharīd sakegā use koī

ġhurbat meñ bhī jo apnī anā kā asiir ho

kyoñ kar vo kar sakegā bhalā apnā sar buland

har ḳhās-o-ām kī jo nazar meñ haqīr ho

aisā kahāñ zamāne meñ paidā huā koī

apnī nazīr aap ho jo be-nazīr ho

khātā hai ġhussa aql-e-bashar ko magar ye raaz

samjhegā kab lakīr kā jo bhī faqīr ho

lagte haiñ ḳhār-dār daraḳhtoñ pe phal magar

lagtā hai phal bhī vaisā ki jaisā ḳhamīr ho

kam-zarf ke paḌos kā pūchho na hāl-e-zār

muñh-zor hai ġharīb ho chāhe amiir ho

lete haiñ kaam hosh se chaltā hai vaqt par

dīda-varoñ ke haath meñ ḳhanjar ki tiir ho

arsh-e-adab ke chāñd sitāroñ meñ hai shumār

'nayyar' 'firāq' 'zauq' ki 'ġhālib' ho 'mīr' ho

ho wo amir-e-shahr ki bhuka faqir ho

KHush-baKHt use kahenge jo raushan zamir ho

daulat se kab KHarid sakega use koi

ghurbat mein bhi jo apni ana ka asir ho

kyon kar wo kar sakega bhala apna sar buland

har KHas-o-am ki jo nazar mein haqir ho

aisa kahan zamane mein paida hua koi

apni nazir aap ho jo be-nazir ho

khata hai ghussa aql-e-bashar ko magar ye raaz

samjhega kab lakir ka jo bhi faqir ho

lagte hain KHar-dar daraKHton pe phal magar

lagta hai phal bhi waisa ki jaisa KHamir ho

kam-zarf ke paDos ka puchho na haal-e-zar

munh-zor hai gharib ho chahe amir ho

lete hain kaam hosh se chalta hai waqt par

dida-waron ke hath mein KHanjar ki tir ho

arsh-e-adab ke chand sitaron mein hai shumar

'nayyar' 'firaq' 'zauq' ki 'ghaalib' ho 'mir' ho