hoga aisa bhi koi mard-e-KHuda mere baad

hogā aisā bhī koī mard-e-ḳhudā mere baad

degā duniyā ko jo paiġhām-e-vafā mere baad

zindagī bhar na milegā lab-o-lahja merā

hone ko hoñge bahut naġhma-sarā mere baad

maiñ to jaane ko chalā jā.ūñ tirī mahfil se

kis ko tanhā.ī meñ degā tū sadā mere baad

merī tasvīr mire ḳhat mujhe vāpas de do

yahī rulvā.eñge tum ko ba-ḳhudā mere baad

dil ulaT jā.egā sāvan meñ qayāmat hogī

phir suneñge na papīhe kī sadā mere baad

bijliyāñ chāk-garebāñ nazar ā.eñgī tumheñ

ḳhuun barsā.egī sāvan kī ghaTā mere baad

aa.ina sāmne rakh kar jise tum dekhte ho

nazar aa.egā vo murjhāyā huā mere baad

ḳhatm ho jā.egā 'muḳhtār' qayāmat kā shor

phir na hogā kabhī hangāma bapā mere baad

hoga aisa bhi koi mard-e-KHuda mere baad

dega duniya ko jo paigham-e-wafa mere baad

zindagi bhar na milega lab-o-lahja mera

hone ko honge bahut naghma-sara mere baad

main to jaane ko chala jaun teri mahfil se

kis ko tanhai mein dega tu sada mere baad

meri taswir mere KHat mujhe wapas de do

yahi rulwaenge tum ko ba-KHuda mere baad

dil ulaT jaega sawan mein qayamat hogi

phir sunenge na papihe ki sada mere baad

bijliyan chaak-gareban nazar aaengi tumhein

KHun barsaegi sawan ki ghaTa mere baad

aaina samne rakh kar jise tum dekhte ho

nazar aaega wo murjhaya hua mere baad

KHatm ho jaega 'muKHtar' qayamat ka shor

phir na hoga kabhi hangama bapa mere baad