hon apne ya ki parae sabhi ke man mein rahe

hoñ apne yā ki parā.e sabhī ke man meñ rahe

divāna aap kā is shaan se zaman meñ rahe

judā.ī jab na sahī jā.egī vo aa.egā

mirā surāġh lagātā isī jatan meñ rahe

shu'ūr paas nahīñ hai zamīñ pe rahne kā

magar vo faḳhr se kahte haiñ ham gagan meñ rahe

ḳhayāl-e-yār se āzādī ab kahāñ hāsil

akele meñ rahe ham yā ki anjuman meñ rahe

amīr-e-shahr ko kuchh ġham nahīñ ġharīboñ kā

barahna jism rahe yā ki pairahan meñ rahe

banāyā ahl-e-mohabbat ne āñkhoñ kā taarā

azal se ham jo mohabbat kī anjuman meñ rahe

hayā bhī aap ke īmāñ kā juzv hai 'nāzāñ'

hayā kā paanī sadā aap ke nayan meñ rahe

hon apne ya ki parae sabhi ke man mein rahe

diwana aap ka is shan se zaman mein rahe

judai jab na sahi jaegi wo aaega

mera suragh lagata isi jatan mein rahe

shu'ur pas nahin hai zamin pe rahne ka

magar wo faKHr se kahte hain hum gagan mein rahe

KHayal-e-yar se aazadi ab kahan hasil

akele mein rahe hum ya ki anjuman mein rahe

amir-e-shahr ko kuchh gham nahin gharibon ka

barahna jism rahe ya ki pairahan mein rahe

banaya ahl-e-mohabbat ne aankhon ka tara

azal se hum jo mohabbat ki anjuman mein rahe

haya bhi aap ke iman ka juzw hai 'nazan'

haya ka pani sada aap ke nayan mein rahe