hone ki gawahi ke liye KHak bahut hai

hone kī gavāhī ke liye ḳhaak bahut hai

yā kuchh bhī nahīñ hone kā idrāk bahut hai

ik bhūlī huī baat hai ik TuuTā huā ḳhvāb

ham ahl-e-mohabbat ko ye imlāk bahut hai

kuchh dar-badarī raas bahut aa.ī hai mujh ko

kuchh ḳhāna-ḳharāboñ meñ mirī dhaak bahut hai

parvāz ko par khol nahīñ paatā huuñ apne

aur dekhne meñ vus.at-e-aflāk bahut hai

kyā us se mulāqāt kā imkāñ bhī nahīñ ab

kyuuñ in dinoñ mailī tirī poshāk bahut hai

āñkhoñ meñ haiñ mahfūz tire ishq ke lamhāt

dariyā ko ḳhayāl-e-ḳhas-o-ḳhāshāk bahut hai

nādim hai bahut tū bhī 'jamāl' apne kiye par

aur dekh le vo aañkh bhī namnāk bahut hai

hone ki gawahi ke liye KHak bahut hai

ya kuchh bhi nahin hone ka idrak bahut hai

ek bhuli hui baat hai ek TuTa hua KHwab

hum ahl-e-mohabbat ko ye imlak bahut hai

kuchh dar-badari ras bahut aai hai mujh ko

kuchh KHana-KHarabon mein meri dhak bahut hai

parwaz ko par khol nahin pata hun apne

aur dekhne mein wusat-e-aflak bahut hai

kya us se mulaqat ka imkan bhi nahin ab

kyun in dinon maili teri poshak bahut hai

aankhon mein hain mahfuz tere ishq ke lamhat

dariya ko KHayal-e-KHas-o-KHashak bahut hai

nadim hai bahut tu bhi 'jamal' apne kiye par

aur dekh le wo aankh bhi namnak bahut hai