hone ki ek jhalak si dikha kar chala gaya

hone kī ik jhalak sī dikhā kar chalā gayā

kholī thī ham ne aañkh ki manzar chalā gayā

kyā ḳhud ko dekhne kā ajab shauq thā ki vo

chup-chāp uTh ke sū-e-samundar chalā gayā

kin dā.eroñ meñ ghūmte haiñ ab ḳhabar nahīñ

kyuuñ haath se vo chaak sā chakkar chalā gayā

pahle qadam pe ḳhatm huā qissa-e-junūñ

pahlā qadam hī dasht barābar chalā gayā

ham bhī usī ke saath ga.e hosh se 'sa.īd'

lamha jo qaid-e-vaqt se bāhar chalā gayā

hone ki ek jhalak si dikha kar chala gaya

kholi thi hum ne aankh ki manzar chala gaya

kya KHud ko dekhne ka ajab shauq tha ki wo

chup-chap uTh ke su-e-samundar chala gaya

kin daeron mein ghumte hain ab KHabar nahin

kyun hath se wo chaak sa chakkar chala gaya

pahle qadam pe KHatm hua qissa-e-junun

pahla qadam hi dasht barabar chala gaya

hum bhi usi ke sath gae hosh se 'said'

lamha jo qaid-e-waqt se bahar chala gaya