ہونے کو جشن فصل بہاراں ہوئے تو کیا

ہونے کو جشن فصل بہاراں ہوئے تو کیا

دو چار پھول چاک گریباں ہوئے تو کیا

جب آبروئے بزم مہ و مہر لٹ چکی

پلکوں پہ کچھ ستارے فروزاں ہوئے تو کیا

تعبیر میں مجھے غم انساں تو مل گیا

کچھ خواب صرف گردش دوراں ہوئے تو کیا

سرشار کیف ذوق نمو ہے چمن چمن

اہل خزاں حریف بہاراں ہوئے تو کیا

تاریکیٔ شب غم انساں نہ مٹ سکی

اشکوں سے گام گام چراغاں ہوئے تو کیا

سینے کے زخم زخم سے پھوٹی ہیں کونپلیں

تاراج حسرتوں کے گلستاں ہوئے تو کیا

جھکنے سے آبروئے جبیں اور گھٹ گئی

نقش سجود لاکھ نمایاں ہوئے تو کیا