honTon ki hansi dard ka darman to nahin hai

hoñToñ kī hañsī dard kā darmāñ to nahīñ hai

merī hī tarah tū bhī pareshāñ to nahīñ hai

maiñ tujh ko kabhī ḳhud se alag kar nahīñ saktā

tū zid hai mirī tū koī armāñ to nahīñ hai

kyā jāniye kyoñ dhuup nikal aa.ī achānak

jo sar pe hai vo abr-e-gurezāñ to nahīñ hai

ai mujh pe umaD aa.e hue chāñd batā de

ye chāñdnī ik raat kī mehmāñ to nahīñ hai

is baar tujhe saiñt ke siine meñ rakhūñgā

tū dil hai tū ashk-e-sar-e-mizhgāñ to nahīñ hai

har ishq salīqe se kiyā ham ne bhī 'ḳhālid'

majnūñ kī tarah chāk-garebāñ to nahīñ hai

honTon ki hansi dard ka darman to nahin hai

meri hi tarah tu bhi pareshan to nahin hai

main tujh ko kabhi KHud se alag kar nahin sakta

tu zid hai meri tu koi arman to nahin hai

kya jaaniye kyon dhup nikal aai achanak

jo sar pe hai wo abr-e-gurezan to nahin hai

ai mujh pe umaD aae hue chand bata de

ye chandni ek raat ki mehman to nahin hai

is bar tujhe saint ke sine mein rakhunga

tu dil hai tu ashk-e-sar-e-mizhgan to nahin hai

har ishq saliqe se kiya hum ne bhi 'KHalid'

majnun ki tarah chaak-gareban to nahin hai