honTon par mahsus hui hai aankhon se madum rahi hai

hoñToñ par mahsūs huī hai āñkhoñ se ma.adūm rahī hai

phulvārī kī ''nighat-dulhan'' phulvārī meñ ghuum rahī hai

us kā āñchal aur āveze merā māthā chuum rahī hai

phir bhī chashm-e-bad-tīnat pur-ulfat lā-ma.alūm rahī hai

har mai-kash kī zehnī laġhzish is mehvar par ghuum rahī hai

jaise vo sambhlā baiThā hai jaise mahfil jhuum rahī hai

chunñā hai to muskāne se pahle chun lo koī kalī bhī

gulshan meñ khilne se pahle tak be-shak ma.asūm rahī hai

tum ishrat se fāriġh ho kar mujh se pūchho maiñ vāqif huuñ

kis kis bechāre kī ḳhvāhish naġhmoñ se mahrūm rahī hai

is se us se merī bābat rozāna sargoshī ya.anī

bante kyuuñ ho merī hālat tum ko bhī ma.alūm rahī hai

piine vāloñ ke kahne se ġham se chhuTkārā paane ko

pī kar bhī merī tanhā.ī māyūs o maġhmūm rahī hai

aariz aariz sub.h-e-bahārāñ gesū gesū shām-e-nasheman

vo kyā jaane jis kī ġhaflat jalvoñ se mahrūm rahī hai

maiñ taḳh.īlī naḳhlistāñ meñ āñkheñ band kiye baiThā huuñ

merī mustaqbil-andeshī manzil manzil ghuum rahī hai

varna sīdhe-sāde sajde varna sīdhī-sādī hamdeñ

duniyā kyā aur kyuuñ ke hāthoñ bhārī patthar chuum rahī hai

hamdardī ke muñh par fan kī āñkheñ khultī haiñ ai 'shād'

goyā insānī hamdardī shā.er kā maqsūm rahī hai

honTon par mahsus hui hai aankhon se madum rahi hai

phulwari ki nighat-dulhan phulwari mein ghum rahi hai

us ka aanchal aur aaweze mera matha chum rahi hai

phir bhi chashm-e-bad-tinat pur-ulfat la-malum rahi hai

har mai-kash ki zehni laghzish is mehwar par ghum rahi hai

jaise wo sambhla baiTha hai jaise mahfil jhum rahi hai

chunna hai to muskane se pahle chun lo koi kali bhi

gulshan mein khilne se pahle tak be-shak masum rahi hai

tum ishrat se farigh ho kar mujh se puchho main waqif hun

kis kis bechaare ki KHwahish naghmon se mahrum rahi hai

is se us se meri babat rozana sargoshi yani

bante kyun ho meri haalat tum ko bhi malum rahi hai

pine walon ke kahne se gham se chhuTkara pane ko

pi kar bhi meri tanhai mayus o maghmum rahi hai

aariz aariz subh-e-bahaaran gesu gesu sham-e-nasheman

wo kya jaane jis ki ghaflat jalwon se mahrum rahi hai

main taKHili naKHlistan mein aankhen band kiye baiTha hun

meri mustaqbil-andeshi manzil manzil ghum rahi hai

warna sidhe-sade sajde warna sidhi-sadi hamden

duniya kya aur kyun ke hathon bhaari patthar chum rahi hai

hamdardi ke munh par fan ki aankhen khulti hain ai 'shad'

goya insani hamdardi shaer ka maqsum rahi hai