honTon pe agarche mere muskan saji hai

hoñToñ pe agarche mire muskān sajī hai

ab bhī mirī palkoñ pe to halkī sī namī hai

aa kar koī baiThā hai ḳhayāloñ meñ jo is dam

āñkhoñ kī ye barsāt zarā der rukī hai

maiñ ḳhud huuñ kahīñ aur dil-e-ġham-dīda kahīñ aur

jazbāt meñ ehsās meñ ik barf jamī hai

ḳhvāboñ ke darīche se jo jhāñkā hai kisī ne

dil ne kahīñ siine meñ koī aah bharī hai

tasvīr-e-ġham-o-dard banī jaatī huuñ ab to

kaisī mire mālik mirī taqdīr likhī hai

dil dard-e-judā.ī se taḌaptā hai har ik pal

huuñ bhiiḌ meñ logoñ ke magar terī kamī hai

dil jaltā hai kyūñkar na karūñ aah aur zaarī

tūfān hai siine meñ ik halchal sī machī hai

lagtā hai ki jaltā hai in āñkhoñ meñ koī ḳhvāb

uThtā hai dhuāñ jaise kahīñ aag lagī hai

ik pal kī judā.ī mujhe manzūr nahīñ ab

himmat nahīñ jiine kī baḌī saḳht ghaḌī hai

galiyoñ meñ khaḌe ho ke tirī raah takūñ maiñ

zanjīr tire hijr kī pairoñ meñ paḌī hai

baaqī nahīñ jiine kī tamannā mire dil meñ

aa dekh le 'ra.anā' tirī kis ġham meñ ghulī hai

honTon pe agarche mere muskan saji hai

ab bhi meri palkon pe to halki si nami hai

aa kar koi baiTha hai KHayalon mein jo is dam

aankhon ki ye barsat zara der ruki hai

main KHud hun kahin aur dil-e-gham-dida kahin aur

jazbaat mein ehsas mein ek barf jami hai

KHwabon ke dariche se jo jhanka hai kisi ne

dil ne kahin sine mein koi aah bhari hai

taswir-e-gham-o-dard bani jati hun ab to

kaisi mere malik meri taqdir likhi hai

dil dard-e-judai se taDapta hai har ek pal

hun bhiD mein logon ke magar teri kami hai

dil jalta hai kyunkar na karun aah aur zari

tufan hai sine mein ek halchal si machi hai

lagta hai ki jalta hai in aankhon mein koi KHwab

uThta hai dhuan jaise kahin aag lagi hai

ek pal ki judai mujhe manzur nahin ab

himmat nahin jine ki baDi saKHt ghaDi hai

galiyon mein khaDe ho ke teri rah takun main

zanjir tere hijr ki pairon mein paDi hai

baqi nahin jine ki tamanna mere dil mein

aa dekh le 'rana' teri kis gham mein ghuli hai