honTon pe bhule se kabhi bhi tera nam na aaega

hoñToñ pe bhūle se kabhī bhī terā naam na aa.egā

merī rusvā.ī kā jā tujh par ilzām na aa.egā

ab ke khule hī rah jā.eñge āshāoñ ke darvāze

pathrā jā.eñgī sab āñkheñ lekin shyām na aa.egā

ho jā.egā ḳhushk achānak ik din peḌ ta.alluq kā

ḳhālis ḳhuun kā āḳhirī qatra bhī kuchh kaam na aa.egā

shauq se tum ilzām tarāsho shahr-badar kar do lekin

phir dobāra is bastī meñ ye badnām na aa.egā

vāpas hote har panchhī ke hoñToñ par ik nauha hai

aah samundar paar se ab koī paiġhām na aa.egā

bāhar barfoñ kī yūrish hai andar sho.aloñ kī yalġhār

'parvez' apnī zaat ko ab shāyad ārām na aa.egā

honTon pe bhule se kabhi bhi tera nam na aaega

meri ruswai ka ja tujh par ilzam na aaega

ab ke khule hi rah jaenge aashaon ke darwaze

pathra jaengi sab aankhen lekin shyam na aaega

ho jaega KHushk achanak ek din peD talluq ka

KHalis KHun ka aaKHiri qatra bhi kuchh kaam na aaega

shauq se tum ilzam tarasho shahr-badar kar do lekin

phir dobara is basti mein ye badnam na aaega

wapas hote har panchhi ke honTon par ek nauha hai

aah samundar par se ab koi paigham na aaega

bahar barfon ki yurish hai andar shoalon ki yalghaar

'parwez' apni zat ko ab shayad aaram na aaega