hosh aate hi hasinon ko qayamat aai

hosh aate hī hasīnoñ ko qayāmat aa.ī

aañkh meñ fitnagarī dil meñ sharārat aa.ī

kyā tasavvur hai nihāyat mujhe hairat aa.ī

aa.ine meñ bhī nazar terī hī sūrat aa.ī

is adā se dam-e-raftār qayāmat aa.ī

aise ham kyuuñ na hue un ko ye hasrat aa.ī

roz-e-mahshar jo mirī daad kī naubat aa.ī

ye ga.ī vo ga.ī kab haath qayāmat aa.ī

ab isī par to hai tākīd vafādārī kī

jab gayā jaan se maiñ ġhair kī shāmat aa.ī

kah ga.e taan se vo aa ke mire marqad par

sone vaale tujhe kis tarah se rāhat aa.ī

ban sañvar kar jo vo aa.e to ye maiñ jaan gayā

ab ga.ī jaan ga.ī aa.ī tabī.at aa.ī

rakh diyā muñh pe mire haath shab-e-vasl us ne

be-hijābī ke liye kaam shikāyat aa.ī

jab ye khātā hai mirā ḳhūn-e-jigar khātā hai

dil-e-bīmār ko kis chiiz pe raġhbat aa.ī

garche az-had huuñ gunahgār musalmān to huuñ

pīchhe pīchhe mire dozaḳh meñ bhī jannat aa.ī

maiñ huā shefta un par vo adū par shaidā

saath ke saath hī donoñ kī tabī.at aa.ī

umr bhar us ko kaleje se lagā.e rakhā

tere bīmār ko jis dard meñ lazzat aa.ī

hijr meñ jaan nikaltī nahīñ kyā aafat hai

maar kar aaj ajal ko shab-e-furqat aa.ī

apne dīvānoñ ko dekhā to kahā ghabrā kar

ye na.ī vaz.a kī kis mulk se ḳhilqat aa.ī

jazb-e-dil khīñch hī laayā unheñ mere dar tak

paañv paḌtī huī har-chand nazākat aa.ī

yuuñ to pāmāl hue saikḌoñ miTne vaale

pahle gintī meñ jo aa.ī mirī turbat aa.ī

hashr kā va.ada bhī karte nahīñ vo kahte haiñ

farz kar lo jo ka.ī baar qayāmat aa.ī

'dāġh' ghabrāo nahīñ ab koī dam ke dam meñ

lo mubārak ho taraqqī kī bhī saa.at aa.ī

hosh aate hi hasinon ko qayamat aai

aankh mein fitnagari dil mein shararat aai

kya tasawwur hai nihayat mujhe hairat aai

aaine mein bhi nazar teri hi surat aai

is ada se dam-e-raftar qayamat aai

aise hum kyun na hue un ko ye hasrat aai

roz-e-mahshar jo meri dad ki naubat aai

ye gai wo gai kab hath qayamat aai

ab isi par to hai takid wafadari ki

jab gaya jaan se main ghair ki shamat aai

kah gae tan se wo aa ke mere marqad par

sone wale tujhe kis tarah se rahat aai

ban sanwar kar jo wo aae to ye main jaan gaya

ab gai jaan gai aai tabiat aai

rakh diya munh pe mere hath shab-e-wasl us ne

be-hijabi ke liye kaam shikayat aai

jab ye khata hai mera KHun-e-jigar khata hai

dil-e-bimar ko kis chiz pe raghbat aai

garche az-had hun gunahgar musalman to hun

pichhe pichhe mere dozaKH mein bhi jannat aai

main hua shefta un par wo adu par shaida

sath ke sath hi donon ki tabiat aai

umr bhar us ko kaleje se lagae rakha

tere bimar ko jis dard mein lazzat aai

hijr mein jaan nikalti nahin kya aafat hai

mar kar aaj ajal ko shab-e-furqat aai

apne diwanon ko dekha to kaha ghabra kar

ye nai waza ki kis mulk se KHilqat aai

jazb-e-dil khinch hi laya unhen mere dar tak

panw paDti hui har-chand nazakat aai

yun to pamal hue saikDon miTne wale

pahle ginti mein jo aai meri turbat aai

hashr ka wada bhi karte nahin wo kahte hain

farz kar lo jo kai bar qayamat aai

'dagh' ghabrao nahin ab koi dam ke dam mein

lo mubarak ho taraqqi ki bhi saat aai