ہوش جب پابند حسرت ہو گیا

ہوش جب پابند حسرت ہو گیا

نام مجبوری کا الفت ہو گیا

جان دینا جان عشرت ہو گیا

دیکھنا ان کا قیامت ہو گیا

عشق جب رنگ طبیعت ہو گیا

دید کا چسکہ مصیبت ہو گیا

دیکھ اٹھتی عمر کی نزہت کے ساتھ

ناز تصویر قیامت ہو گیا

ابتلا دلبری میں آنکھ کی

اک زمانہ خوبصورت ہو گیا

بت کدہ کی دل کشی کے سامنے

کعبۂ دل نقش حیرت ہو گیا

ساغر و بادہ سے ہو کر محترز

ہوش کا چاہا اکارت ہو گیا

برہمن راہ طریقت میں رہا

شیخ مر کر رکن جنت ہو گیا

دید کا سودا ہوا جب سے گراں

سر جھکانا بھی عبادت ہو گیا

شادؔ ہو کر دیکھتے ہو تم ہمیں

یوں نزول ابر رحمت ہو گیا