hosh jis waqt bhi aaega giraftaron ko

hosh jis vaqt bhī aa.egā giraftāroñ ko

ḳhas kī mānind uḌā Dāleñge dīvāroñ ko

zindagī karnī hai tum ko to taḌapnā sīkho

zañg lag jaatā hai rakkhī huī talvāroñ ko

zaḳhm siine pe kisī ke nahīñ aayā ab tak

āzmāyā hai bahut qaum ke sardāroñ ko

itne ūñche bhī na uTTho ki sambhal bhī na sako

ham ne girte hue dekhā ka.ī mīnāroñ ko

buzdilī hai ki ye nādānī hai āḳhir kyā hai

log ashkoñ se bujhāne lage añgāroñ ko

vahī rishvat vahī iġhvā vahī ḳhabreñ 'irfāñ'

ham to bin dekhe hī paḌh lete haiñ aḳhbāroñ ko

hosh jis waqt bhi aaega giraftaron ko

KHas ki manind uDa Dalenge diwaron ko

zindagi karni hai tum ko to taDapna sikho

zang lag jata hai rakkhi hui talwaron ko

zaKHm sine pe kisi ke nahin aaya ab tak

aazmaya hai bahut qaum ke sardaron ko

itne unche bhi na uTTho ki sambhal bhi na sako

hum ne girte hue dekha kai minaron ko

buzdili hai ki ye nadani hai aaKHir kya hai

log ashkon se bujhane lage angaron ko

wahi rishwat wahi ighwa wahi KHabren 'irfan'

hum to bin dekhe hi paDh lete hain aKHbaron ko